2006年8月19日

八月之精夏令營【上集】

對上一次去camp已經係04年國慶,當年係三日兩夜camp(9月30日至10月2日),仲記得當日0係CNT傾續約傾到火紅火綠,記得臨走我仲話:「總之冇呢個價我唔會考慮,呢幾日我唔會開電話,有咩留番放完假先講!」,跟住就冇鞋挽屐走,因為約佐其他營友0係金鐘元氣等,話咁快就兩年喇!

今次係兩日一夜camp,唔同0既係我地唔再夜媽媽集合,破壞王亦0係我威逼之下參加,輪子上次因為剛有身孕而唔去,今次就因為子晴都仲係太細而缺席,我地明白架,所以...我地都趁未做人父母盡情地玩個夠!!!

入到梅窩當然又係食餐蛋麵啦,唔知點解九男女除佐壽司就係餐蛋麵,醫飽肚就去掃貨準備當晚0既BBQ喇。究竟係因為九男女識諗佐,定係因為窮佐,我地好似苦媽上身咁格過價先買,見對面凍肉舖要HK$6一包金菇,我就飛撲返去惠康買HK$6.8兩包,為佐今日返工而要殿後0既辛苦菇時,我地會買夠四包金菇0黎孝敬你架;當某人拎起冇特價0既卡樂B,我就一個屈尾十轉佐特價HK$9筒0既利士薯片。

各人都一袋二袋咁,滿載而歸,入到塘福已經四點,今次間屋視覺上比前年果間大少少,可能因為係Open Kitchen關係,我地小休十幾分鐘就落沙灘玩扑西瓜,正式開始我地玩玩食食大行動。

  • 咁大個女未見過一行廿幾隻0既牛群,場面極為壯觀,尤其一堆堆“地雷”
  • 阿珍原來係唔識分左右,淨係識聽「呢邊」、「另一邊」
  • 阿椒原來真係好信身邊朋友,從冇擔心阿珍會點條黑路我行,所以贏佐肥巴幾條街
  • 男哥就相反,阿椒猛叫佢向而家個方向向前快跑,佢不但偏離原有航道,仲行慢佐,激死
  • 西瓜碌落海一幕唔只令我地失笑,連旁邊0既路人都感染一份
  • 兩個Master一組原來冇好結果,肥巴慘敗而回

返到屋都六點幾,我同阿珍就作BBQ前預備,男哥同肥巴就出東涌接菇時,破壞就幫Lu生透爐,各有各忙。九男女聚埋點會冇事發生,繼Lu生倒瀉一地炭後,阿珍亦0係菇時到步後冇耐,上演一幕“李靜高禮澤職業安全之廚房篇”,一把菜刀應聲而落,幸好各人0既腳趾仍健在。整晚最滿意食物係“沙茶醬焗青口”,最恐怖事件係“肥巴將燒烤叉倒插於圓凳”,男女坐落去都冇好下場0架喎,究竟佢同邊個咁大仇口?同場仲有兩隻agnes b加一隻小強於不遠處虎視眈眈!

3 則留言:

匿名 說...

我已經將全部金菇掃清,以報答大家的支持!

睇番video,阿椒真係咁多個之中行得最快0架!能夠對九男女有呢份信任,實在係難能可貴,我為你的樂觀及勇氣鼓掌!

匿名 說...

我唔係唔想信任你同阿珍架,
只過係第一次玩果時比巴淫老點,
成隻右腳連西瓜帶石炒埋一碟,
我至開始懷疑我既組員咋!

匿名 說...

我都話囉...我係“人不犯我,我不犯人”,你冇跣我,我唔會點條黑路你行呢!

睇黎,你同淫巴有幾“好兄弟”,呢個遊戲已經表露無遺。