2006年8月16日

廟街睇相佬

收工後同阿楚、Fred、MiMi媽同老闆公食飯,當然唔少得蘇蝦Emily同工人Molina啦。蘇蝦已經兩歲,好得意,識講好多野,夾雜英文同廣東話,可惜我只聽到兩成,一路0係佢Daddy架車,佢一路不停講野:「Bi li ba la bi li ba la ba ba la la ba ba... Hold, Auntie Molina Hold」,大概估到係叫我地扶緊,架車轉緊彎。

我地揀佐和民,好耐冇黎過,水準依舊,發現海鮮冷麵好好味,席間阿楚提及早前帶埋阿Fred去搵廟街相士,講D野仲好鬼準添,搞到MiMi媽好心急話要去見下佢。 ﹝呢個相士幾年前批過阿楚會識到阿Fred,婚姻好幸福云云,阿楚當時搞緊離婚,所以極之唔相信自己會好幸福,冇幾個月後真係識到阿Fred,住0既地區以及生肖都同相士講0既一樣,所以阿楚就好信佢﹞

我地食完野都十一點幾,滾水淥腳就渣車過去,相士一睇MiMi媽同老闆公個出生年月日,就講:「你!好彩嫁到呢個老公,唔係你咁鬼野蠻都冇男人頂得你順;轉頭望住老闆公,你呀,好鬼怕老婆,正一鱷魚頭老襯底,得個樣係惡,查實鬼死咁易呃,如果唔係得你老婆,你肯定仆街。」,我地0係側邊聽到笑到反肚,事實上老闆公真係好怕MiMi媽。

跟住問佐好多關於自身同仔女0既問題,MiMi媽就轉問事業,相士話佢呢今年會辛苦D,出年會好喇,然後轉頭望我:「你唔似佢,佢個相係冇事業架,掌紋又冇事業線。」我當堂緊張起黎,莫非我會乞食?!?!相士話:「唔係,除非你唔結婚,你一結婚就冇得做,正宗“女生外向”就係你呢D,老公搵錢俾你,你轉頭就益番外家。」,阿楚0係側邊笑到不能自拔,話要睇下自己個女有冇呢副相添!

嘩!!搞到十二點三先散場,返到屋企都一點。講乜唔洗做都冇用,我聽日咪又一樣返去面對排山倒海0既工作,呢D野,笑下咪算囉,咪當真添呀!! ^_^

沒有留言: