2006年5月28日

大佬壽辰/六四遊行

是日啤梨大佬生日,講聲生日快樂先,你又老一歲喇,哈哈哈!

聽見新聞報導話豬聯會又搞紀念六四遊行,驚覺原來已經十七年喇,想當年真係好鬼震撼,但我地呢班受殖民地教育0既,講真丫,乜野係政治根本唔知,更遑論乜野叫“愛國”啦。當時我只係個初中生,仲記得事發後某日上晝,各師生齊集大禮堂喥,個個聲嘶力竭咁話聲援班學生,喊苦喊忽程度好似集體哭喪咁,每人臂上都纏住條黑絹,為乜呢?坦白講,我果陣都係跟大隊咋。

過佐冇幾多年0者,都冇乜人提起囉,究竟係香港人太善忘?定係果班學運領袖令大家唔想再記住佢地呢?當然,兩者都有,香港人善忘呢樣野不嬲都知啦,呢樣野不足為奇。班學運領袖一個二個走佐去美國俾人庇護,個個食到肥肥白白,嘩!原來美國佬對D落難中國人咁好架?!唔睇你地幾個真係唔知添,得閒呢個又搞下離婚,得閒果個又搞下緋聞,唔只好食好住,私生活仲多姿多采添!走唔甩又入埋冊果班又點呢?唔緊要喎,有招叫“保外就醫”,萬試萬靈,一樣掂過碌蔗。

沒有留言: