2006年5月27日

電視汁撈飯

最近無線D劇集都唔錯,早前《女人唔易做》明顯睇得出係小本製作,幸有如妃鄧萃雯支撐大局,成為整齣劇0既命脈。《火舞黃沙》係另一齣令我會晚晚返屋企追0既劇集,個人感覺條主線依然係一眾女主角,猶如《金枝慾孽》翻版,唯一敗筆係無論廠景定外景都係黃咁咁。

我最鍾意0既角色肯定係焦玉蔡少芬,佢係好戲之人已毋庸置異,但過往多數都係演一D較柔弱0既角色,最激果次都係《天地豪情》入面虛榮到爆0既孫樺,勢估唔到佢今次飾演焦玉呢個巴辣女當家,亦都入型入格,尋晚講到佢俾家春分追問打種一事,佢話:『呢D事豈容你呢個宋家細新抱過問!』,嘩...氣焰逼人,又不會太過火而令人覺得造作。

至於另一個我較為鍾意0既角色竟然係計明鳳,個人一向不太喜歡黎姿,覺得佢演技欠奉,乜都係擺個“靚樣”出黎就當交足戲,雖然今次佢都冇摒棄“靚樣”,但真係好鍾意佢同老爺閰國業鬥智鬥力,為佐維護老公閰萬曦,而精心部署將老爺趕出閰家舖,仲係用佢老爺一向用慣0既招數“人言可畏”。當閰國業臨走時,計明鳳都只係話:『明鳳何德何能同老爺你鬥丫,只係參考老爺果招“人言可畏”,明鳳...都只係東施效顰0者!』

反而另一套《飛短留長父子兵》就麻麻,我真係頂唔順陳松伶扮後生,仲要夥拍肯定後生佢一截0既蔡子健同鄭嘉穎。以前讀書時代,個個都當“松松姐姐”係女神,我就覺得佢造作到不得之了。仲記得我讀初中時,佢果套《天涯歌女》首播,夥拍當時仲係新仔0既黎天王。『頂!邊個夾硬鍊住個鼻唱歌呀?』,我一聽到就鬧,然後想轉台。冇錯,係想下0者,大家都記得十幾年前0既亞視係幾咁不濟啦,轉台咪等於熄佐部電視,所以咪由得佢自己播,播到大結局囉,結局後套劇講過乜我真係唔知。

3 則留言:

匿名 說...

好贊同松松姐姐扮後生果個樣真係好難頂...,有時候仲要配音添,頂~~
本來我都好鍾意睇嘉穎,而家搞到好不知所謂,都唔襯o既~

匿名 說...

陳松齡真係好厲害呀,我一家大細都係唔鍾意佢喎,覺得佢太造作,好唔自然!其實呢個社會,好少人見到男女老少都唔 LIKEY 既人,佢都算係一個俵俵者囉!

匿名 說...

係啦,套劇九成半演員都好,搵陳松伶做女主角係一大污點,雖然話倉底貨0者,倉底貨都有倉底貨0既尊嚴架嘛!

嘉穎仔都係襯十二妹周麗淇好D!