2006年5月23日

『路人甲乙丙』之『騎呢夫婦』

尋日講過月台助理,今日想講下一對夫婦,究竟佢地有咩咁特別呢?

呢對夫婦年齡約三十到抆,女的打扮得好鬼花枝招展,Set到個頭行晒,例必前V後V勁貼身衫,下身配以一條飄逸短裙,好彩佢唔肥囉,整體都OK0既;男的同佢簡直係兩個世界0既人,除佐“哩啡”兩個字,確實諗唔到其他形容詞,油頭垢面、一件原本應該係白色0既T恤已變成灰黃,原本係圓領0既領口已經洗到變佐形,配襯一條比孖煙囪稍長的褲,褲管已經有霉爛0既痕跡,加埋腳上一對殘殘舊舊0既黑色涼鞋,手上郤挽著一個LV小圓桶手袋,相信係佢老婆0既。(事實上我唔鍾意男人幫女人拎手袋,呢句野出街後亦避免不了會得罪好多人。)

呢對夫婦多數都坐0係我對面,女0既一上車就要“納架生”化妝,務求在短短二十分鐘車程裡改頭換面,男0既呢,就會訓到昏死一樣,打晒鼻鼾,儀態欠奉。(唔係儀態盡失,因為都冇乜儀態可言,又有咩好失呢?)我對呢對夫婦真係極之好奇,好奇在究竟乜野驅使佢地變成一對呢?

我雖然對衣著唔係好講究,但一定接受唔到個咁“不修篇幅”0既另一半,拖出街唔醜咩?如果佢係結婚後先成為一隻“完全變態*”生物,變到簡直唔能夠接受0既話,相信...“哩啡”都會係我同佢離婚0既主要原因。


*註:記唔記得咩係“完全變態”呀?唔係變態佬果D變態呀,小學自然科咪講過囉,蝴蝶就係“完全變態”,而蜻蜓就係“不完全變態”呀。

沒有留言: