獅城自由行 Day 6
第六日喇...要走喇(係我0者,椒爸下個月尾先返),有D唔捨得,因為唔想返工,但冇計啦,聽日要去撼淫珍宴嘛。如果係參加旅行團,呢個算係六日團喇,今日都要計埋導遊費添架...好彩係自由行0者!
今日真係遇到好多個“8”,8點落樓搭858號巴士去機場,打出黎張飛係8點零8分。0係8號櫃位Check-In,登機閘係F58,航班係SQ862,返到香港連拎行李都係8號,真係8到發發下!

返到屋企都未夠五點,今日冇乜相睇呀,不如講下去新加坡有乜要注意。
旅坡小貼士
》每年十一月中旬至一月都係雨季,無論朝早幾好天、幾曬、太陽有幾猛烈都好,一到中午就
九成機會落雨,仲係狗屎果隻,有時仲會打雷添,但夜晚就好涼爽,唔洗開冷氣訓架
》每年四月至六月都會比較悶熱,陽光又猛又烈,係令人週身唔自在咁,如果怕呢種天氣0既朋
友就迴避下喇(我第一個閃)
》電壓同香港一樣都係220W,三腳插頭
》而家匯率係一蚊坡紙兌五蚊港紙,除佐住屋外,其實呢喥0既洗費同香港有得揮,有D日用品
仲貴過香港
》交通方面:
的士 - 佢地叫德士架,坐四個乘客,首1公里SG$2.4,之後每220米SG$0.1,午夜時
份要收附加費,通常係錶價1.5倍;另外假日或前夕都要收多一蚊,如果由機
場出發就要收多三至五蚊不等
巴士 - 大部份路線有分段收費,上車時同司機講去邊,佢會話你知價錢,入佐錢佢會
拑張飛俾你,記住Keep起佢呀,可能會查飛架
地鐵 - 佢地叫MRT,買單程票會Mark-Up多一蚊,出閘後攝番張咭入GTM機會俾番
一蚊你,我估係張咭個成本
》飲食方面,如果你唔要求食得好豪,街邊檔會仲有風味添,而且多數食店係冇冷氣,類似港
式酒樓仲會俾人斬到一頸血出番黎,誠心勸大家:『寧入麥當奴,莫去大酒樓』
》有部份食店係得D英文唔似英文0既Menu,其實係福建話或者馬拉話譯音,例如:
Kopi:咖啡0既福建發音,0係呢喥就會係一杯加佐煉奶0既咖啡
Kopi-O:有糖黑咖啡,O就係“黑”0既福建話
Kopi Kosong:冇糖黑咖啡,Kosong係零、空虛0既馬拉話
Kopitiam:咖啡店,Tiam係“店”0既福建發音
Teh:茶,又係福建發音,一樣有Teh-O同Teh Kosong
》曾經見到有間大排檔寫“糜”...係呀糜爛個糜丫嘛,中文黎架,係潮州話個“粥”字0既
發音,問你死未!
2 則留言:
辣椒:
6日行程都睇晒,多謝妳o既實地報道,感覺就好似真係去o左咁,我鍾意聖淘沙o既Underwater world、牛車水原?館同埋Kusa Island囉。又鍾意食婆蝦、蕃茄咸菜鴨湯、杯Latte咖啡隔離果舊曲奇...同埋七彩o既益力多。Good!
妳下次會去邊度玩呀?
下次去邊?如無意外應該係九男女海外之旅啦...
今次行程最開心其實應該係椒爸,我諗佢冇諗過我出佐黎做野仲會同佢去旅行,其實我想同埋媽咪去,可惜佢行唔開,睇睇下次點安排可以一家人一齊去。
至於益力多,真係想帶俾大家試,但唔知係佢包裝唔夠實淨定係飛機氣壓影響,我包到佢好似木乃伊咁都漏漏地,唔敢拎出黎喇!
發佈留言