2006年11月26日

獅城自由行 Day 4

尋晚唱K唱到兩點呀,所以今日中午時份先出發。今日除佐我同椒爸,仲有姑媽、細表姐Cat同細表姐夫(佢側面勁似高官曾俊華)同行,先搭的士去到Marina South Pier,去到剛搭到一點鐘班船,唔係就要等到三點喇,真係好彩。船程只係廿分鐘,沿途又經過Sentosa,你話新加坡幾細丫!

Kusu Island中文即係龜嶼島,Kusu係福建譯音,唔知以為係日本名,懶有東洋Feel咁。呢個島好細架咋,唔洗一粒鐘行晒,我地先去大伯公廟參觀,點知一入到有瓦遮頭0既地方即落雨,仲行雷添,冇計,呢個時份係雨季,日日搭到正中午過後就會落雨,唯有叫幾碟小炒當Lunch,順便避下雨先。

雨停佐就行上山,山上冇乜野特別,有個廟供奉佐位唔知甚麼拿督,奇就奇在裝飾同祭品就中西印合壁,有壇香、聖杯、元寶、紅蠟燭,仲有白蠟燭,神主牌中英文都有,天神位仲寫埋「The God Of Heaven」,但主色係黃色,成間印度廟咁。


三點半有船走喇,反正冇野行,返出市區好過啦。回程航線會經過St. John Island,呢喥以前係新加坡唯一一間戒毒所,而家搬佐囉。回程時間要四十分鐘,多一倍時間。之後搭巴士再轉地鐵出市區,0係Raffles Place週圍行佐一陣,其實尋日都黎過啦,只係今日係星期日,特別多人,尤其係大陸觀光團。然0係榴槤頭附近食晚飯,順道可以睇埋夜景。

明天行程預告:烏節路,小印度

沒有留言: