2006年11月29日

淫珍聯婚之大茶飯

今日十二點九就入到天水圍,0係淫宅出發0既就只得我、新郎LU同新老爺LU爸。我地就猶如三個打扮得非常“四正”0既咕呢,梗係啦...你見過著晒西裝皮鞋、或者連身裙加斗擰爭0既咕呢團未丫?冇計啦,為佐唔想走幾次,咪九袋長老上身咁,務求一轉LIFT就載晒D“所需物資”出去,LU同LU爸好驚我唔夠力拎,我都話我平時係負責買米架啦,你地又唔信,雖然冇手瓜起墊,但都孔武有力架嘛,哈哈!一點半就去到第二站珍宅喇,載埋其他“所需物資”就出發到婚宴場地 ── 美麗華酒店。

我同幾位姊妹0係佢地0既“新房”Hea佐一陣,執下呢樣搞下果樣,冇耐就有化妝小姐黎到,個妝足足化佐兩粒鐘有多,我替阿珍辛苦,佢個內心一定好焦急,冇法啦,但呢個化妝小姐似乎係“慢工出細貨”。阿珍出得場時已經係六點幾接近七點喇,當時好多親友都到佐,呢個時候,新人梗係陸續同眾親友影相啦,而我身為伴娘就要搵個有利位置企0係喥等候差遣。

企企下,見到新郎LU前上司Patrick Li,以前佢同我都有D偈傾0既,自從離開長記後都少佐聯絡,而當時聽聞佢搞緊離婚,為免俾人家講閒話,我都係避免同呢D失婚男人單獨約會,閒話呢家野我真係好怕架嘛。之但係我係一個有家教0既人,0係今晚呢D場合,我冇理由唔主動過去打招呼0既,佢先呆兩秒,繼而相認番,又話自己之前唔見佐電話搞到斷六親云云,再懶熱情咁又話遲下約我出黎食飯,寒暄呢D野,我梗係識啦,你仲當我係當年果個十八廿二咩!哈...唔知佢見到我地當晚0既前長城之友陣容,有咩感覺呢?都係佢同小強搞果個ERP Project囉,洗佐幾百萬又如何,最終都要Call Off,但係就撮合佐我地九個,多S晒。

講番D食物丫,每碟個賣相都係非常之咁吸引,可惜我冇乜點食,除佐頭盤乳豬係睇住佢上而夾佐兩舊外(以“仲有最靚0既豬腩肉”一曲襯托出場),其他0既...都係忙完一輪返埋位時已變成“超級冷盤”,其他兄弟姊妹就講到好好味囉 -_-" 我想食熱0既 >_< 。仲有,我碗翅呀,雖然凍佐,我都食佐一半先陪阿珍出去敬酒丫,返黎就俾侍應收佐...唔制呀,俾番我呀,我要食翅!!!忙完敬酒已經係美點雙輝,唔見佐半碗翅對我打擊真係好大,佢地講到D蓬萊米有幾好味我都冇試,果一刻我已經飽...雖然冇乜點食野。 送完賓客已經十二點,收拾細軟拎番去淫珍新房,點算過後已經係凌晨一點,多謝淫珍豪兩舊水俾我搭的士,都話唔洗客氣囉,嘻嘻...多S晒!(頂,原來而家冇七折,諗住有幾十蚊油水架嘛...哈哈)

3 則留言:

匿名 說...

妳o既實地報道我覺得好鬼正呀!若果妳唔係入o左電腦呢行,我覺得妳應該係做記者,尤其見到Patrick Li果part,我果晚都見妳同佢寒喧幾句,但估唔到...妳d戲又交得幾足喎!哈哈哈....
講開又講,果餐d野食真係唔錯o架,每一味都好好食,我覺得若果妳可以同我地一圍就very good喇!
雖然有時候我都要出去幫下手,行行企企咁,呢d野,梗要啦~(話晒呢個係我地06年九男女o既最大盛事o丫嘛!)
仲有呀,我發現原來Dinny都可以同我地玩得好埋架!有潛力!
仲有Sherman添,點解珍妮絲咁遲先介紹佢俾我識呀?買奶粉有quota架!^_^

匿名 說...

哈哈...有discount先o岩

匿名 說...

係呀,我真係好鍾意Dinny,計埋今次婚宴,佢其實同肥巴見面只有三次,唔知點解好了解肥巴果份為人,句句窒到應一應,真係聞者開心,聽者過癮!