2007年11月25日

令人燥狂的地鐵

地鐵係每日必要搭嘅交通工具,我對佢真係又愛又恨,愛佢控制時間好,恨...多囉,數一晚都數唔完,更可恨係我沒法子離棄佢。

1. 「必必必必」響起仲有人起勢衝入黎,然後同你撞個正著,啤佢又唔係,鬧佢又唔係,火在心裡燒。

2. 超逼嘅環境,你同對面嘅人只係相距唔夠5cm,呢個人唔識死地唔掩口打喊露,我真係好想講粗口鬧佢,大家都知朝早嘅口腔就算刷咗牙都係幾咁“清新”,你唔掩口唯有我掩,仲送你一個“兇狠”眼神。

3. 又係超逼嘅環境,後面條粉腸夠膽死恃住自己高而恰我矮,當我個頭係個Book Stand咁黎睇佢份報市日報,小喇叭,你真係以為我會啞忍咩?你真係俾我善良外表呃得透,我會一嘢向後拍你份報市日報,睇吖拿,睇~

4. 當企嘅位置都唔夠時,唔該有得坐嘅人自律啲,唔好懶型咁翹腳坐,你地知唔知當你地咁有儀態時,你翹起咗嘅腳係佔咗兩呎空間,企嘅人埋唔到你身...邊嘅扶手,你可知你嗰兩呎位分分鐘企到三個人。

5. 四五隻手扶住嘅一碌柱,竟然仲有個唔知死嘅麻甩用個又厚又臭嘅背脊挨落黎,更討厭係除咗我之外嘅其餘四隻手嘅主人只敢輕輕地用眼喺麻甩不知情之下厲佢一下,把鬼~咩!每次都係我狠勁地用指力曲起彈佢背,然後出聲:「唔好挨住我隻手吖~唔該!」,呢句「唔該」當然好有火藥味。

以上只係冰山一角,地鐵令人嘅燥狂嘅事例多不勝數,日日新鮮日日甘。

3 則留言:

匿名 說...

我試過一次響唔迫人既時候撘地鐵,成碌柱只得我一個人扶住,之後響下一個站竟然遇到個男人扶住同一碌柱,咁大碌柱得我地兩個人用,但係佢隻手邊係緊貼住我隻手邊,唔知佢係咪好唔介意同其他男人有少少接觸呢,我就非常介意喇,最後響長達十幾秒既接觸之後,我終於頂唔順縮手...

匿名 說...

可能佢係基民呢,咪唔介意囉,仲好Enjoy添...不過我唔會十幾秒先頂唔順,我好抗拒架,最多3秒就Action!

♀蛋糕核桃恩♂ 說...

3秒太長啦,
0.1秒就Action!!